8/6 (Day 1)
經過禽日嘅黑雨同山泥傾瀉嚇一嚇, 今日去機場都唔敢怠慢!
又要搭機鐵, 但係又要慳錢, 唯一方法就係搭地鐵去青衣再轉機鐵!
禽日機鐵竟然會出現企位, 今日都唔差, 全車6成坐滿!
去到機場, 第一件事梗係攞機票跟住 check-in 啦,
但係個旅行社肥叔叔就做野鬼死咁慢, 仲成日四圍媾女,
真係心急死人喇!!
好彩寄完行李過埋關都仲夠時間去買杯奶茶飲!!
一路行一路飲, 行到去閘口都已經上左一半機了!!
第一次坐中華航空, 聽人講話好似坐戰鬥機咁,
又話佢安全好差, 其實都有D擔心!!
好彩嗰日天氣唔算太差, 全程都無遇到大氣流,
平平安安咁就降落左响桃園機場!! (途中仲睇左半齣"史前一萬年")
落機之後, 跟著資料嘅指示, 沒有第一時間對換台幣, 咁就出左事喇!
第一間找換店應該係對得最高的! (所以會有好多人排隊)
我地一行四人, 一路行一路行, 直至出左機場禁區,
先發現原來資料講嘅就係嗰間!!
好彩我地期中一個身上有大量台幣, 咁就可以暫時唔洗換住!!
(資料不能盡信, 但無資料又唔得,
好彩大致上都準確, 只係出左小問題姐!!)
坐巴士去民宿途中, 在園山飯店附近時, 落左一場大驟雨,
唔係掛, 咁掃興?!
好彩落左無幾耐就停左雨!!
巴士去到民宿附近已經差不多下午三點了,
但係附近嘅街道總係有冷清清的感覺, 一D都唔覺得似大城市嘅街道!!
頭先就落大雨, 依加就出猛太陽,
一路等包租婆, 一路流晒大汗!! ~_~!!
終於入左屋, 放底D野, 洗個面, 涼陣冷氣就又出動了!!
事關我地仲未食午餐架!! 餓死人喇!!
星期日嘅台北住戶區就好似上環咁,
十居其九都係關門大吉的, 想話要搵檔野食都幾難下!!
行啊行啊, 又熱又餓, 最後都係屈服左响 7-11之下!!
之後行左去忠孝新生站, 諗住買張悠遊卡 (即台北八達通),
點知又比部機食左錢唔出卡喎, 搞左一輪, 雞同鴨講, 真係糗到爆!!
之後就去左市政府站嘅誠品同台北101 hea 逛!!
(時間關係, skip 左國父紀念館)
跟住再去士林夜市食街邊野,
熱屎辣辣, 人頭湧湧, 食完成身濕晒!!
之後再去左美麗華坐摩天輪,
用香港學生証都有折架!! :D
17分鐘話長唔長, 話短唔短,
但係台北市嘅夜景離美麗華實在太遠了,
沒有香港夜景咁好睇!!
回程時又去多次幫襯7-11, 事關明天嘅午餐食乜都係靠佢架啦!!
9/6 (Day 2)
今日係星期一, 香港嘅端午節補假,
但係台灣好似無尼回事!
一出門口, 同禽日情況完全唔同晒,
行人唔多, 但係D車多到丫, 由其是電單車,
佢地會打橫片埋嚟同行人爭過馬路, 真係好鬼嚇人!!
不過大部份司機都好有禮貌的, 會比你過完佢先加速駛走!!
早上九點鐘, 太陽就已經開始"辣"肉了!
去左附近嘅阜杭豆漿食早餐! (其實佢地嘅"早餐"應該一早就賣晒了)
由於係室內無冷氣嘅關係, 好似入左個蒸籠咁, 越食越大汗!
最後拿拿聲食完就出發去一個好遠嘅目的地 -- 八仙海岸!
在關渡站上左紅22, 要坐半個鐘頭車, 先可以到達目的地,
去到時已經係十一點鐘了!!
換完衫, 跳落水, 玩啊玩, 晒啊晒!
無帶拖鞋, D木板好鬼"辣"腳啊, 救命!!
唔錯, 都幾好玩, 人又唔多, 最緊要係免費!!
玩到三點鐘就離開左八仙海岸了!!
一上車就食件乾糧醫左個肚先, 再邊搖邊瞓咁返去關渡站!
跟住就再搭捷運去淡水!!
去到淡水嘅時候, 站外人頭湧湧, 非常熱鬧!!
原來今日係佢地嘅"清水祖師"誕,
又有花車巡遊, 又燒炮杖, 非常隆重!!
我地睇左一陣之後就轉左入去淡水老街,
一路行一路食, 不過其他野就睇多過買!!
行下行下, 去到好出名嘅阿婆鐵蛋度,
見過其真人, 都唔係咁阿婆姐!!
途中仲遇到火警, 不過人多到連火在那裡都睇唔到!!
差不多到街尾之後, 就 U-turn 返轉頭去買手信,
點知就在手信店前面出現"炮仗陣", 搞到前後不得!!
勁爆左一輪之後, 全街煙霧迷漫, 硫磺味久久不散,
之後馬上入左去店內買手信!!
買完手信之後, 本來行程係要去漁人碼頭同情人橋嘅,
不過紅26似乎當日停駛了, (馬路多人多到跟本行唔到車)
如果要攞住D手信行去漁人碼頭都幾係野,
所以經商議之後決定取消行程, 改為留在淡水晚餐!!
食完晚餐之後, 諗住搭捷運回民宿放低野先,
點知又遇上"炮仗陣", 真係行到邊爆到邊!!
幾經辛苦之後, 終於離開左嗰區, 上左捷運, 回到民宿!!
放低晒D濕衫同手信之後, 我地再次出動,
目的地係西門附近的波鞋街同書店街!!
出左西門捷運站之後, 一直行一直行,
咦...喂..., 唔見左間新東陽嘅? (又比D"資料"騙左)
於是, 就在附近嘅餅店買"宵夜"食!!
餅店就在波鞋街的轉角位, 買完野食諗住轉入去望一望啦,
點知條街黑萌萌, 人影都無隻, 十足人地拍鬼片D街道咁!!
當時係晚上九點四十分, 如果比著係香港嘅波鞋街,
一定係迫到你怕, 走都走唔切嗰隻!!
穿過左波鞋街之後, 就到左書店街,
一樣係冷冷清清的, 十間書店著左九間已關門!!
轉左入一間未關門的書店睇下啦, 點知十分鐘過後,
十點準時拉閘熄燈, 十足學校D校工咁, 一D都無留客嘅意思!!
輾轉去左幾間書店之後, 都已經十點三十分了,
我地就响佢關門前識趣咁自動離開左!
之後我地又蕩到站前地下街,
諗住找一找遲D會用到嘅大型行李儲物櫃!
點知行完成條地下街都找不到大型行李儲物櫃!!
(原來根本唔响地下街, 要過左去台北火車站那邊)
最後無功而回, 唯有返民宿休息!!
10/6 (Day 3)
經過兩日嘅開消之後, 唔換台幣真係唔得啦,
求其在民宿附近嘅小店買左個早餐, 跟住就去找銀行換錢!
(九點鐘已經無早餐賣了, 仲要係已經安排緊下午嘅冷麵套餐添!!)
去左第一間遠東國際商業銀行,
佢地有牌價但係就無得對換, 真係運吉!!
跟住去左台灣銀行, 佢地有得換, 不過對換率仲衰過機場,
唉, 無法啦, 唔夠錢洗都要換架啦!!
就係咁, 全身嘅港紙就比佢清左!!
跟住就搭車去左台北故宮!!
可能係禽日晒過左龍, 十點鐘嘅陽光都"辣"肉"辣"到死死下!!
之之助助, 十點半先憑學生票進入故宮!!
文化嘅野太深奧了, 完全看不懂,
所以只是走馬看花, 吸印仔成為最主要任務!!
但係咁都行左兩個鐘!!
之後去左隔離嗰個至善園行左一陣!!
離開故宮之後, 本來諗住去食鼎泰豐/點水樓,
點知又係時間嘅問題,
結果只係去左士林一間叫咕咕雞嘅食店食快餐!!
咁都好嘅, 爭取返D時間!
用餐途中, 重新 plan 過去九份嘅交通,
發覺如果搭巴士去的話, 去到可能已經好晏,
所以就改搭火車轉巴士! (好彩之前做晒功課姐)
有晒火車嘅班次同時間, 果然好方便,
趕到去火車站, 買埋火車票, 都仲有幾分鐘時間去下廁所!!
架火車好準時咁駛離台北火車站,
向住目的地-瑞芳出發, 途中落住傾盤大雨,
心諗: 九份山城落住毛毛細雨都已經夠悲情,
依加仲要落狗屎咁大雨, 我個旅程真係好悲!!
點知快到瑞芳之時, 天色開始放晴, oh thanks god!!
火車好準時咁到達瑞芳火車站, 真係一d都無誤點,
這點令我覺得好奇怪!! (可能係坐得多大陸火車嘅關係啦!!)
瑞芳, 一個平凡嘅小城鎮,
沒有逗留太久, 就上左巴士去九份!
到達九份嘅時間比預定時間仲要早,
實在太好了, 可以有大把時間行下!!
其實九份就好似香港嘅淺水灣又或者赤柱一樣,
一樣係遊客必到嘅地方, 但係其實又唔知有乜好行架喎!! :P
行到去一個崖邊, 通常遊客會以那裡個為折返點,
因為那裡可以睇到山區嘅景色, 同附近嘅房屋, 街道, 海灣 .......,
而且再行嘅話都唔覺再會有商鋪!
又話山城景色有幾靚, 我一D都唔覺得囉,
十足十一堆山邊嘅木屋區咁, 殘殘舊舊!!
hea 完一大輪之後, 又係返去咁時間,
點知等車時先發覺無碎銀, 咁就眼白白睇住班車走左!!
就咁又等多左二十分鐘, 終於上到巴左返瑞芳!!
返到瑞芳見仲有D時間, 就行左陣頂好超市 (即係香港嘅wellcome),
順便買埋明天嘅早餐!!
去到counter買票, 本來要買19:29嘅自強號去松山站,
點知搞錯買左19:46那班莒光號!!
好彩發現得早, 急急忙忙再去counter搞返正佢,
一出月台架火車就已經响度等緊我地!!
自強號臨時買票係唔會有劃位嘅,
如果滿左就算你唔好彩, 企到有人落車比個位你啦!!
但係又好好彩比我地找到座位一直坐到松山!!
火車又係好準時嘅駛入松山火車站, 真係值得一讚!!
之後就去左饒河街夜市掃街當晚餐!!
但係實在係太熱喇, 食野嘅需要都唔及飲野嘅需要!!
行下食下咁就一個半小時了!!
之後再過隔離嘅五分埔商圈再行過!!
可能大家嘅體力同精神都已經消耗得九九十十,
再加上台灣D衫嘅style同香港有少少唔同,
大家行左一陣都無收穫, 只好拉隊返民宿休息!!
11/6 (Day 4)
連日嘅辛苦(唔想咁早起身), 再加上唔知出去食乜好,
今早嘅早餐竟然就係一個杯麵!!
同包租婆辦完退房手續都已經十一點,
之後再去台北火車站再找過 locker,
終於比我地找到了, 三個鐘七十台幣!!
之後我地就分頭行事, 一班去左書局街再掃書,
而我就選擇去行西門町!!
順住站前地下街一直行, 經過左台北北門郵政局,
入左去hea左一陣, 就高速直奔西門町!!
可能係平日嘅關係, 好多鋪都唔開門或者未開門做生意!!
本來想幫襯一間平價壽司店, 點知那鋪已改建為一間化妝品店了!!
只好在附近求其找一間食店醫肚!!
(得返半個鐘連食連搭車連行去locker, 超趕!!)
兩組人分別先後不過兩分鐘去到 locker 門前,
那時離 locker 三小時之期只餘五分鐘, 睇嚟大家都用盡每一分每一秒!! :P
取回行李之後, 見仲有D時間,
就响火車站內hea左陣, 同安頓一下新購置物品!!
之後就去左坐國光號去桃園機場!!
國光號雖然係貴少少, 不過佢行嘅路線果然係會快少少嘅!!
去到機場, check-in 完畢, 見仲有少少時間,
就响機場內四圍遊蕩, 不過其實係無乜好行嘅!!
入到去候機室, 先發覺班機原來仲未到!!
點解佢地唔响出面公告一吓!!
睇住班機埋閘, 等住上一班機D人離機,
佢地先公報話登機同起飛時間都要同時delay三十分鐘!!
飛機終於在18:55分起飛, 沒有一絲擔擱!!
途中又仲睇埋下半齣"史前一萬年",
同埋試埋台灣食品 -- 阿給, 味道都ok一般啦!!
飛機比預定時間只係遲了5分鐘抵達香港國際機場,
飛行時間竟然可以壓縮左25分鐘!! 那個果然係戰鬥機機師!!
雙腳落地之後, 第一時間就梗係打電話回家報平安啦!!
取回行李, 搭巴士回家, 坐在家中梳化已經係兩個鐘之後嘅事了!!
台灣行程及相關資料 (可作參考之用)
台灣相片 Link
