6月回想 (下)

21/6
今日去左深圳嘅樂園路食海鮮!

晚上八點, 人來人往, 車水馬龍,
點解間間鋪都人頭湧湧架, D野食唔洗錢咩?
無他嘅, 扇貝RMB$1 一隻, 河蝦RMB$28 一斤,
其他野都好平下, 真係非常吸引!!
無奈兩個人食量有限, 加上我對海鮮有敏感,
所以只叫了4個餸!
飲飽食醉, 埋單都只係RMB$85,
唔怪之得咁多香港人會上來食海鮮啦!

咁多水嘅? 究竟嗰d係咩水嚟嘅呢? :P


22/6
今日繼續深圳休閒之旅!
瞓到人地趕走先 check out, 正呀!!
本來想話去附近地方飲下荼, 食個包,
不過實在太晒了, 無乜心機行,
去到附近一間食店, 被人遊說幾下之後就入左去!
原來尼間野係食客瓜菜嘅, 仲要主打係食牛嘅, 問你怕未!! :P
叫左個經濟套餐, 三餸一湯, d餸仲可以隨意更改!!
大大碟, 食唔晒, 只好放棄,
埋單RMB$48 (另加保鮮紙包過嘅杯碟RMB$1 一套)!!

回港後, 去左大埔"奸情牽"參觀新居入伙,
地方細細, 多d野都放唔落, 只適合二人小天地,
上車盤, 算係咁啦, 遲d再轉過間好d囉! :D


23/6
無乜野做過, 成日望實個mon, 作死!! X_X
慳得一蚊得一蚊, 回家食飯最開心!!


24/6
又唔做野望實個mon扮做野!! :P
三號風球, 地下仲係乾爭爭,
出左cwb嘅一生食日式放題,
食到一半, 聽說在兩小時後會改掛八號風球,
吓......, 又話個風唔會吹香港嘅?
埋單前食埋佢個自創嘅一口麻醬拉麵,
嘩......又話夏日清涼食品, 完全唔掂啦,
麵質差, 入口太淋, 食落好似食糊仔咁, 真係想死!!
其實全晚唔係真係食左好多野,
埋單位位$207, 都算係幾貴!!


25/6
早上仲係八號風球, 可以瞓多一陣!! :D
中午食埋個飯先慢慢返公司,
hea 下 hea 下又放工!! Great!!

無啦啦又比人發作作左一野, 怒!!


26/6
明天放假, 所以今日全力起好左個 eProfile server,
免得被人口實!!


27/6
放假又係去銀行搞野嘅時候啦!!
個銀行姐姐好似仲新過我,
要我講返比佢知d詳情!! @_@"
慳得一蚊得一蚊, 一年慳到六百幾都算係咁啦!!

晚上去左尖沙咀鼎泰豐,
出席左個全荒廢口水宴!
其實一早我就估到佢地响度搞緊邊科啦,
神神秘秘玩驚喜! 好, 我就一於奉陪到底!! :D
應曝光嘅遲早都會曝光! 噢......原來係佢!!

之後轉戰去左樓上cafe, 傾傾講講, 咁就十一點了!!

多謝各位比面出席!! :D


28/6
原來旺角朗豪坊附近有間大廈改左個名叫朗晴坊,
上面都有好多間食店可以選擇,
下次唔洗再去迫朗豪坊個 food court了!!

晚上又去左跑馬地竹園食海鮮餐,
可能最近食海鮮食得多過頭,
菜式上沒有什麼新鮮感!!
埋單七百幾, 但係六個人都飽到碌晒响度, 抵晒!!
最後仲要打包埋人地個芝士走人!! :P









29/6
下午去左睇功夫熊貓, 都唔錯, 幾搞笑!!
晚上去左三里屯間 Jack's Terrazza Ristorante 食晚飯,
氣氛唔錯, 仲好有驚喜添, 多謝晒, 好有心思!!

終於有新銀包用啦, 其實都係時候要換左佢了!! :D




30/6
今日繼續放假休息, 全力記返/寫返d發生過嘅事!!
中午自己整左個芝士壽麵比自己食, 味道都唔錯架!! :D
夜晚自己玩煮飯仔, 食埋雪櫃裡面大量舊餸!!
(但原來有部份係我妹嘅傑作, 真係估佢唔到)